Nýsköpunarstyrkir á Íslandi og í Evrópu

Miðviðkudaginn 24. febrúar býður Fjártækniklasinn til stafræns fundar um styrki til nýsköpunarfyrirtækja.

Hvaða möguleikar eru í boði fyrir nýsköpunarfyrirtæki á Íslandi og í Evrópu? Hvað og hvar er hægt að sækja um og hvaða styrkir eiga við ólíka starfsemi og fyrirtæki?

Við fáum að heyra frá þeim Önnu Margréti Guðjónsdóttur frá Evris og Kolbrúnu Bjargmundsdóttur frá Rannís. Þær munu fara yfir þá möguleika sem í boði eru fyrir fyrirtæki, hvernig megi nálgast upplýsingar um styrkina, umsóknarferlið og fleira.

Evris aðstoðar íslensk fyrirtæki við að sækja um erlenda styrki til nýsköpunar, meðal annars til vöruþróunar og undirbúnings markaðssetningar á erlendum mörkuðum. Evris sérhæfir sig þannig í að aðstoða íslensk fyrirtæki í nýsköpun við að færa sig inn á alþjóðlega markaði. Rannís, sem heyrir undir mennta- og menningarmálaráðuneytið, styður við nýsköpun og þekkingarsamfélagið á Íslandi með rekstri ýmissa sjóða og með því að aðstoða fyrirtæki og kynna alþjóðleg sóknarfæri og samstarfsmöguleika.

Ræðumenn:

• Anna Margrét Guðjónsdóttir, stofnandi og framkvæmdastjóri Evris ehf.
• Kolbrún Bjargmundsdóttir, sérfræðingur hjá Rannís

Ræðumenn munu tala í 10-15 mínútur hver og síðan verður opnað fyrir spurningar í gegnum spjallform.

Fundarstjóri verður Gunnlaugur Jónsson, framkvæmdastjóri Fjártækniklasans, og hann mun miðla spurningum.

Fundurinn fer alfarið fram á netinu, allir geta skráð sig og það kostar ekkert.